🤩 Сааскы бэлиэ күнү көрсө нарын үҥкүүһүт кыргыттар түмүстүлэр
🤩 Д.Ф.Ходулов аатынан норуот айымньытын дьиэтигэр Арассыыйаҕа Норуоттар сомоҕолоһууларын, СӨ Култуура сылларыгар уонна сааскы маҥнайгы бырааһынньыкка анаан кэрэ аҥаардар икки ардыларыгар «Күн Чөмчүүк – 2026» үҥкүү өрөспүүбүлүкэтээҕи аһаҕас күөн күрэһэ ыытылынна. СӨ култууратын үтүөлээх үлэһитэ Александра Винокурова ааптардаах бырайыагынан үтүө үгэскэ кубулуйан сыллата буолар тэрээһиҥҥэ быйыл Дьокуускай куораттан, Бүлүү, Анаабыр, Абый, Нам, Уус Алдан, Амма улуустарыттан, улууспут нэһилиэктэриттэн уопсайа 300-тэн тахса кыттааччылаах 31 үҥкүү кэлэктииптэрэ үрдүк таһымнаахтык кытыннылар.
🤩 Кэрэ-нарын далбар хотуннар, килбик кыргыттар толорор иэйиилээх үҥкүүлэрин көрөн-истэн, бастыҥнары быһаарар дьүүллүүр сүбэ бэрэссэдээтэлинэн РФ Театральнай диэйэтэллэрин сойууһун чилиэнэ, СӨ култууратын үтүөлээх үлэһитэ Юрий Федоров уонна СӨ култууратын үтүөлээх үлэһитэ, «Мозаика» бальнай үҥкүү норуодунай ансаамбылын төрүттээччитэ Михаил Сивцев үлэлээтилэр.
🤩 Күн түмүгүнэн «Күн Чөмчүүк – 2026» өрөспүүбүлүкэтээҕи кэрэ аҥаардаар үҥкүү күрэҕэр 13-16 диэри саастаах оҕолор икки ардыларыгар Кылаан Чыпчаал аатын «Индийскэй үҥкүү» – «Сандал» норуодунай ансаамбыл (сал.Сардаана Катакова, Ангелина Ильинова, Дьокуускай) ылла.
🤩 17-35 саастарыгар диэри оҕолорго Кылаан Чыпчаал аатын «Хомус үҥкүүтэ» – «Бүлүү долгуннара» норуодунай үҥкүү ансаамбыла (сал. Ирэна Зинурова, Сахая Народова, Бүлүү улууһа) хаһаайыннара буоллулар.
🤩 Дьүүллүүр сүбэ быһаарыытынан саамай нарыннык үҥкүүлүүр «Күн-Чөмчүүк – 2026» анал ааты «Дылбаахы ыччата» үҥкүү кэлэктиибэ(сал. Говорова Татьяна, Дьанхаады) кыттааччыла Дайаана Гаврильева ылла.
