Улуус күнүгэр үлэ киһитин, бэлиэ сыллары уруйдаатылар

Мэҥэ Хаҥалас дьоно-сэргэтэ үс үллэр үөстээх Өлүөнэ өрүс кытыллаах, күн түһэн үҥкүүлүүр киэҥ нэлэмэн сыһыылаах, Саха чулуута – Манчаары Баһылай өбүгэлээх төрөөбүт улууспут төрүттэммит күнүн өрө көтөҕүллүүлээхтик бэлиэтиибит.

Бу күн Аллараа Бэстээх «Парус» успуорт уораҕайыгар хаһаайыстыбалаах кэпэрэтииптэр, үлэ бастыҥнара тоҕуоруһа муһуннулар.
Бэлиэ күнүнэн мустубут бар дьону улуус баһылыга Дмитрий Тихонов, Мэҥэ Хаҥалас оройуонун дьокутааттарын сэбиэтин бэрэссэдээтэлэ Иннокентий Андросов, Ил Түмэн Судаарыстыбаннай Мунньах Бэрэссэдээтэлин бастакы солбуйааччы Александр Жирков, Ил Түмэн дьокутаата Андрей Находкин, СӨ тыатын хаһаайыстыбатын миниистирин солбуйааччы Анна Стручкова, улуустааҕы тыа хаһаайыстыбатын салалтатын начаалынньыга Аркадий Лукин, судаарыстыбаннай, уопсастыбаннай диэйэтэл Люлия Григорьева уонна XX үйэ рекордсмен ыанньыксыта Павел Шарин эҕэрдэлээтилэр.

Бэлиэ күҥҥэ «Мэҥэ Хаҥалас улууһун Бочуоттаах олохтооҕо» үрдүк суолталаах аат СӨ култууратын туйгунугар Светлана Акимоваҕа, буоксаҕа Арассыыйа успуордун үтүөлээх маастарыгар Василий Егоровка, Саха АССР успуордун маастарыгар Егор Жирковка, Коммунистическай үлэ ударнигар Прокопий Кириллиҥҥэ, РФ норуотун үөрэҕириитин туйгунугар Николай Назаровка, ССРС кинематографиятын туйгунугар Нина Никанороваҕа, үлэ бэтэрээнигэр Николай Свинобоевка, РСФСР үөрэҕириитин туйгунугар Фаина Скрябинаҕа, тыыл, үлэ бэтэрээннэригэр Тамара Апросимоваҕа, Николай Ивановка туттарылынна.