Муус устар 22 күнүгэр Кыталык Баһылай үҥкүү тыйаатырыгар ыалдьыттаата.
Үҥкүү — хамнаныынан киҺи ис туругун көрдөрөр, сыанаҕа хайдах тутта — хапта сылдьаргынан, көрөөччүгэ тыла суох кэпсиир ускуустуба биир уустук көрүҥүнэн буолар.
Муус устар 22 күнүгэр Сергей Зверев аатынан Саха национальнай үҥкүүтүн тыйаатырыгар, дириэктэр Саргылана Иннокентьевна Борисова ыҥырыытынан Саха Республикатын уонна Российскай Федерация култууратын үтүөлээх үлэһитэ, «Душа России» национальнай бириэмийэ лауреата, Арассыыйа норуотун айымньытын үтүөлээх кэллэктиибэ «Кыталык» үҥкүү норуодунай ансаамбылын төрүттээччитэ Василий Павлович Винокуров – Кыталык Баһылай ыалдьыттаата.
Көрсүһүүгэ Саргылана Иннокентьевна Василий Павлович, Александра Гаврильевна Винокуровтар саха үҥкүүтэ сайдыытыгар сүҥкэн улахан кылааттаахтарын, үлэлиир ситимнэрэ оҕо, ыччат иитиититтэн саҕалаан кэлин улаатан баран эбээ, эҺээ буолуохтарыгар диэри биир ыал курдук тутуҺа сылдьар туох эрэ кистэлэҥ ураты күүстээхтэрин, аны тэрийэн ыытар араас хабааннаах конкурстара, кэнсиэрдэрэ, түмсүүлэрэ киҺи кутун — сүрүн ылыннарар, ол абылаҥар уйдаран дьикти турукка киллэрэр ураты суоллааҕын бэлиэтээтэ. Манна барытыгар ансаамбыл маҥнай тэриллиэҕиттэн Василий Павлович олус күүстээх, нууччалыы эттэххэ үчүгэй организатор, менеджер, психолог, туруорааччы, уҺуйааччы, салайааччы быҺыытынан дууҺатын ууран туран үлэлиирэ арылхайдык көстөр.
Василий Павлович тула олорон тыйаатыр үлэһиттэрэ, артыыстара олус умсугутуулаах, кини олоҕун үтүө кэрчиктэрин, ону сэргэ чуолаан саха үҥкүүтүн сайдыытын тула тус санааларын олус тиийимтиэтик, холкутук туттан кэпсиирин сэргээн иһиттибит. Киһи олоҕо куруутун остуол ньуурун курдук эриэ — дэхси буолбатын, олох обургу охторон ылан оонньотордоох, сытыаран ылан сылатардаах буоларын истэ олорон арааһы толкуйдуугун, онуоха Баһылай тулхадыйбат модун санаалаах, ҮҤКҮҮ таҥарата анаан айбыт хамсаныыларын бар дьонугар тарҕата, сайыннара, угуйа сылдьарыттан санааҥ көтөҕүллэр. Василий Павлович кэпсээнин быыһыгар «ити барыта не от хорошей жизни…» — диэн арыт күллэртээн ылар, үҥкүү эйгэтигэр киэҥ билиилээҕин, бэйэтигэр тардан ылар күүһүгэр истэ олорон итэҕэйэҕин.
Эдэр үлэһит Баһылай үөрэҕин бүтэрэн кэлээт аатырбыт артыыс, драматург, хореограф, мас ууһа биир дойдулааҕа Иоаким Дмитриевич Избековы кытта билсибитин, киниттэн элбэҕи сүбэлэппитин, айар үлэтигэр ханнык хайысханы тутан, сүрүн сыалын оҥостубутун туһунан этиитин мустубут дьон олус сэргии иһиттибит. Саха өһүн хоһооно «Кырдьаҕастан — сүбэтин, эдэртэн — эйэтин» — диэн бэргэн этии бүгүҥҥү кэпсэтии сүрүн өйдөбүлүн, суолтатын арыйда.
Василий Павлович кэпсэтии түмүгэр аар – саарга аатырбыт «Оһуор үҥкүүтэ», хас эмэ көлүөнэ устата уол оҕо иитиитигэр сүрүн болҕомтотун уурбут «Буойуҥҥа уһуйуу» үҥкүүлэрин ис хоҺооннорун, хамнаныыларын дьиҥнээх олоххо баартан ылыллыбытын сиҺилии кэпсээтэ. Өр сылларга араас дойдуларга ансаамбылын кытта араас бэстибээллэргэ, конкурстарга кыттан, кинилэр култуураларын, норуот быһыытынан биллэр үҥкүүлэрин ырытан, холобурдаан сүрдэрин көтөҕөр үҥкүүлэрин хамнаныыларыгар тохтоон, «СҮР КӨТӨҔҮҮ» бырайыагын ордук чуолаан тыйаатыр эр дьонун артыыстарыгар сэһэргээтэ уонна маастар кылааһын ыытта.
Василий Павлович эр дьон сүрүн көтөҕөр «Буойуҥҥа уһуйуу» үҥкүүнү идэлээх артыыстарга үөрэтэн, эдэр дьоҥҥо алгыһын анаабытынан, ытыс тыаһынан үтүө көрсүһүүбүт түмүктэннэ.
