Бүгүн Марфа уонна Сергей Расторгуевтар ааттарынан Саха Судаарыстыбаннай циркатыгар Аҕа Дойду көмүскээччилэрин күнүгэр анаан «Сүр көтөҕүү» эстрада уонна цирка артыыстара кыттыылаах синтез бырайыактарын бар дьоҥҥо көрдөрдүлэр.

Ураты тыыннаах, сахалыы айылгылаах кэнсиэр үһүс көлүөнэлэр ситимнэрин бөҕөргөтөн, хорсун быһыы уонна эйэлээх олох суолтатын дириҥэтэн көрдөрдө.

Тэрээһини Саха Судаарыстыбаннай циркатын дириэктэрэ, уус-уран салайааччыта, Арассыыйа уонна СӨ үтүөлээх артыыһа, сахалартан бастакы идэтийбит мим, жонглёр Сергей Расторгуев уонна «Сүр көтөҕүү» бырайыак ааптара, «Душа России» национальнай бириэмийэ лауреата, Арассыыйа уонна СӨ култууратын үтүөлээх үлэһитэ Василий Винокуров – Кыталык Баһылай бииргэ ылсан итэҕэтиилээхтик туруоран, көрөөччүлэри уйадыттылар.
Анал байыаннай дьайыыга охтубут, итиэннэ күн бүгүн эйэлээх олох иһин туруулаһа сылдьар Арассыыйа дьоруойдарын, «Эр санаа» уордьан, «Хорсунун иһин», «Бойобуой үтүөлэрин иһин» мэтээллэр хаһаайыттарын санаан, кэнэҕэски ыччакка кэрэһит буолаллар.

Дойду, норуот иһин олохторун толук уурбут саха буойуттарын ахтан, кинилэр кыайыыны ситиһиигэ, бэриниигэ уонна Аҕа дойдуга тапталга үөрэппиттэригэр махтана сүгүрүйдүлэр.

Бэлиэ күнү СӨ үтүөлээх артыыһа, Арассыыйа култууратын үтүөлээх үлэһитэ, А.Е. Кулаковскай аатынан Судаарыстыбаннай бириэмийэ лауреата, Дьокуускай куорат бочуоттаах олохтооҕо, сир түннүгэ ытык киһибит Афанасий Федоров алгыстаах тылынан арыйда. Кини алгыһа санаа күүһүн ыраастаан, кыайыыга ыҥыран, көмүскээччилэр күүстэрин бөҕөргөттө.

Синтез-бырайыагы Арассыыйа үтүөлээх кэлэктиибэ «Кыталык» үҥкүү норуодунай ансамбыла, сахабыт чаҕылхай ырыаһыттара: Аскалон Павлов, Умсуура, Лэгэнтэй, Виталий Очиров, Юрислав Гольдеров, Күндэл, Николай Никифоров, Мичиллэй, Александр Неустроев, «Аарык» эр дьон ансаамбыла киэргэттилэр. Итиэннэ Саха циркэтин артыыстара: «Трио Аттар» салайааччыта Роман Романов, «Канатоходцы» салайааччыта Валерий Егасов, «Акробатическая дорожка» салайааччыта Спартак Романов, «Мачты» салайааччыта Александр Посельскай кыттыыны ылан, киэһэни ураты тыыннаатылар.

Түмүккэ Оһуохай бэстибээл Гран-при хаһаайыттара уонна Саха Өрөспүүбүлүкэтин бастыҥ оһуохайдьыттара санаа күүһүн ыраастаан, алгыстаан, этэн-тыынан кыайыыга кынаттаатылар.

Бу тэрээһин санаа күүһүн уонна сүрү көтөҕөн, кыайыыга ыҥыран, Аҕа дойдуга тапталлаах, бэриниилээх буолууну бар дьоҥҥо көрдөрдө. Тэрээһинтэн киирбит үп-харчы анал байыаннай дьайыыга сылдьар хорсун уолаттарбытыгар көмө буолуоҕа.