Ахсынньы 7 күнүгэр Дьокуускайга «Сэргэлээх уоттара» култуура киинигэр Мэҥэ Хаҥалас улууһа уонна өрөспүүбүлүкэ киэн туттар наруотунай ансаамбыла, Арассыыйа үтүөлээх коллектива «Кыталык» 45 сыллаах үбүлүөйүн бэлиэтиир үҥкүү дьоро түһүлгэтэ ааста.
Биллиилээх кэлэктииби Сергей Афанасьевич Зверев — Кыыл Уолун аатынан СӨ национальнай үҥкүү тыйаатырын үҥкүүһүттэрэ аркыастыр доҕуһуолунан саха саарына Кыыл Уола туруорбут «Оһуор үҥкүүтүнэн» эҕэрдэлээтилэр.

«Кыталык». Үҥкүү бөлөҕүттэн — хамсааһыҥҥа тиийэ

Сахабыт сирин элбэхтэ араас дойдуларга, ССРС уонна Россия элбэх куораттарыгар ааттаппыт, «Оһуор үҥкүүтэ», «Буойуҥҥа уһуйуу», «Саҥа хаар» курдук үҥкүүлэринэн киэҥ эйгэҕэ биллэр, үгүс дьон биһирэбилин ылыан ылбыт, Василий Павлович Винокуров салайааччылаах, «Кыталык» үҥкүү народнай ансаамбыла 45 сыллаах төрүттэммит күнүгэр, көрөөччүлэригэр истиҥ дьоро киэһэни бэлэхтээтэ.

Василий Павлович 1979 сыллаахха Кемеровотааҕы култуура институтун бүтэрэн кэлиэҕиттэн, олоҕун аргыһа Александра Гаврильевнаны кытта тоҕус көлүөнэ үҥкүүһүттэри бэлэмнээн таһаардылар.

Кинилэртэн хас да оҕо бэйэлэрэ араас хайысхалаах үҥкүү бөлөхтөрүн тэрийэн, дьоро күҥҥэ түмсэн, дьиҥнээх Үҥкүү Өрөгөйүн бэлэхтээтилэр, Саха сиригэр «Кыталык» диэн хамсааһын үөскээбитин туоһулаатылар.

Ансаамбыл кыһыл көмүс репертуарыгар киирбит үҥкүүлэрин туруорарга сүбэһит буолбута Саха АССР үтүөлээх артыыһа Иоаким Дмитриевич Избеков, онтон “Кыталык” диэн сүрэхтээбитэ Саха АССР культуратын үтүөлээх үлэһитэ Алексей Леонтьевич Попов.

1981 сыллаахха “Кыталык” ансаамбылга “Народнай” аат иҥэриллибитэ.

Билиҥҥи кэмҥэ диэри “Кыталык” оҕону, ыччаты, улахан да дьону үҥкүү кэрэ эйгэтигэр угуйар, аан дойдуну тилийэ көппүт биллиилээх коллектив буолар.