Өрөспүүбүлүкэтээҕи спортивно-баальнай турнир уонна Өрөспүүбүлүкэтээҕи отечественно-баальнай үҥкүүнү толорооччулар икки ардыларыгар конкурс-фестиваль ахсынньы 22 күнүгэр Аллара Бэстээххэ “Парус” уораҕайга ыытылынна. Дьокуускай куораттан, Амма, Нам, Горнай, Хаҥалас, Таатта, Бүлүү, Уус-Алдан уонна Мэҥэ-Хаҥалас улуустарыттан 30-тан тахса үҥкүү кулууптара кыттыыны ыллылар. Быйылгы үбүлүөйдээх сылбытыгар хаһааҥҥытааҕар да элбэх кыттааччы кэлэн тэрийээччилэри үөртэ – уопсайа 516 кыттааччы!
Үөрүүлээх тэрээһиммитигэр ыалдьыттаатылар Саха Өрөспүүбүлүкэтигэр художественнай гимнастика президена, “Кыталык” ансаамбыл көмүс састаабын выпускницата Людмила Валерьевна Николаева, Мэҥэ-Хаҥалас улууһун аҕа баһылыга Дмитрий Иванович Тихонов, Саха Национальнай көрдөрөр иһитиннэрэр хампаанньа журналиһа, “Кыталык” ансаамбыл көмүс састаабын выпускницата Катерина Юрьевна Григорьева, Мэҥэ-Хаҥалас улууһун Култуураҕа уонна Духуобунай сайдыыга салалтатын салайааччыта Анна Руслановна Исакова, Аллара Бэстээх бөһүөлэгин баһылыга Юрий Николаевич Колмаков. Күрэх үөрүүлээх аһыллыытыгар ыалдьыттарбыт эҕэрдэ тылларын, истиҥ баҕа санааларын эттилэр, “Кыталык” ансаамбыл үгүс суолталаах үлэтин сыаналаатылар. Юрий Колмаков Василий Павловичка Винокуровка үөрүүлээх быһыыга-майгыга “Үгүс сыллаах сыралаах үлэтин, үҥкүү ускуустубата Аллара Бэстээххэ сайдыытыгар кылаатын” иһин грамота уонна илиигэ кэтиллэр чаһы, “Кыталык” оҕо-ыччат эстетическэй киинин дириэктэригэр Сардана Ивановна Терентьеваҕа “Аллара Бэстээх бөһүөлэгэ култууратын эйгэтигэр кылаатын” иһин, Майя Дмитриевна Ноеваҕа “За вклад в развитие народного художественного творчества Республики Саха(Якутия)” бочуоттаах бэлиэ туттарыннылар.
Спортивно-баальнай турнирга алта үҥкүү кулууба 12 группанан, отечество-баальнай үҥкүүнү толорооччулар конкурс-фестивалларыгар 25 кулууп 29 группанан хайдан кытыннылар. Бу үҥкүү салаалара Саха Сиригэр, улууспутугар тэтимнээхтик сайдан иһэллэрин бэлиэтиир. Турнирдар кылаабынай судьуйатынан Саха Өрөспүүбүлүкэтин култууратын үтүөлээх үлэһитэ, Үөрэҕирии туйгуна, Саха Сиринээҕи үҥкүү спордун Федерациятын президенэ Михаил Захарович Сивцев үлэлээтэ, иилээн-саҕалаан ыытта Юрий Захарович Алексеев – Российскай Федерация үҥкүү спордугар I-гы категориялаах судьуйата, “Санрайз” үҥкүү кулуубун салайааччыта.
Кыайыылаахтар дипломунан, мэтээлинэн наҕараадаланан, кыттааччылар үөрүүлэрэ үрдээн, аныгыс күрэхтэргэ көрсүөххэ диэри дэһэн астынан тарҕастылар. Үҥкүүнэн утумнаахтык дьарыктанын, биһиги ансаамбылбыт куруутун баҕалаахтары күүтэр, ыҥырар!