Бу дьыл ахсынньы 5 күнүгэр Д.Ф. Ходулов аат. норуот айымньытын дьиэтигэр “Кыталык” үҥкүү народнай ансаамбыла үбүлүөйдээх 45 сылыгар аналлаах нарын-намчы кэрэчээн кыргыттар күөн көрсөр Өрөспүүбүлүкэтээҕи  аһаҕас “Кыталык Куо” күрэх буолан ааста. Күрэх балаһыанньатынан, араас ансаамбылга үҥкүүлүү сылдьар, үҥкүүнэн дьарыктанар талааннаах кэрэ куолар кыттыбыттара. Ол курдук, Айталыына Попова, Мэҥэ-Хаҥалас , Майатааҕы Ф.Г. Охлопков аатынан орто оскуола үҥкүүтүн куруһуогун иитиллээччитэ, салайааччылар Потапова Лена Павловна, Шестакова Виктория Дмитриевна; Евгения Александрова, Аллара Бэстээхтээҕи 2-с нүөмэрдээх оскуола иһинэн үлэлиир “Кыталык” филиалын иитиллээччитэ, салайааччылар Боппосова Саргылана Егоровна, Владимирова Мария Сергеевна; Алина Федорова, “Кыталык” үҥкүү норуодунай ансаамбыл сүрүн састаабын иитиллээччитэ, салайааччы Соловьева Александра Петровна; Айыына Попова, Майатааҕы В.П. Ларионов аат. оскуола үҥкүүтүн куруһуогун иитиллээччитэ, салайааччылар Евсеева Анна Николаевна, Прохорова Евдокия Михайловна, Артемьева Лидия Ивановна; Диана Петрова, Амма улууһун Амма нэһилиэгиттэн төрүттээх “Уран” үҥкүү ансаамбылын иитиллээччитэ, салайааччы Индеев Ньургун Игоревич; Алия Дмитриева, “Кыталык” үҥкүү норуодунай ансаамбыл сүрүн састаабын иитиллээччитэ, салайааччы Соловьева Александра Петровна.

Дьоро киэһэбитин иилээн-саҕалаан ыыттылар мэҥэлэр тумус туттар биир чаҕылхай ыччаттарбыт Станислав Иванов уонна Николай Васильев – Айтамыл. Күрэххэ дьүүллүүр сүбэҕэ үлэлээтилэр: Александр Сергеевич Кулешов – дьүүллүүр сүбэ председателя, Мэҥэ-Хаҥалас улууһун култуураҕа уонна духуобунай сайдыыга салалтатын салайааччыны солбуйааччы; Алексей Иннокентьевич Неустроев – Майа тыа сирин түөлбэтин дьаһалтатын баһылыга; Василий Егорович Захаров – Марыына Попова аатынан Майатааҕы оҕо искусствотын оскуолатын дириэктэрэ; Михаил Васильевич Петров — Мэҥэ-Хаҥалас улууһун үөрэҕирии салалтатын салайааччытын солбуйааччы; Ая Дмитриевна Слепцова – Марфа уонна Сергей Расторгуевтар аатынан Саха Сирин Государственнай циркатын балетын артыыската, аан маҥнай ыытыллыбыт “Кыталык Куо” кыайыылааҕа.

Кыттааччылары 5 түһүмэҕинэн көрөн сыаналаатылар;

“Төрдүм-ууһум – кэскилим” фольклор жанрдарын туһанан бэйэни билиһиннэрии;

“Талааным – мин көтөр кынатым” – талааны көрдөрөр түһүмэх;

“Норуотум мин баайым” интеллектуальнай конкурс;

фитнес-аэробика;

“Кыырай халлаан кыргыттара” дефиле.

Маҥнайгы түһүмэххэ кыргыттарбыт бииртэн биир сиэдэрэй сахалыы мандардаах таҥастаах, ыллаан-туойан, хомустаан, уустаан-ураннаан ийэ тылларынан бэйэлэрин билиһиннэрбиттэрэ.

Иккис түһүмэххэ кыттааччылар талааннарын сөҕө-махтайа көрдүбүт. Айталыына Попова бэйэтэ гитаран доҕуһуоллаан ылбаҕай ырыатын бэлэхтээбитэ, Алина Федорова олус уустук хамсаныылардаах “Дьөһөгөй” үҥкүүтүн үҥкүүлээбитэ, Евгения Александрова бэрт сэргэх хотугулуу үҥкүүнү пааранан үҥкүүлээн көрдөрбүтэ, Айыына Попова дьүөгэ кыргыттарынаан аныгылыы тэтимнээх, уоттаах-күөстээх үҥкүүнү үҥкүүлээбиттэрэ, Диана Петрова күрэхпит аатыгар сөп түбэһиннэрэн “Кыталык” үҥкүүтүн үҥкүүлээбитэ, дьүөгэ кыргыттара ол кэмҥэ дьүүллүүр сүбэни сахалыы аһынан күндүлээбиттэрэ, Алия Дмитриева тэҥҥэ дьарыктанар уолаттарынаан дириҥ ис хоһоонноох “Тыын иҥэринии” үҥкүүтүн көрдөрбүттэрэ. Кыргыттарбыт бары олус талааннаахтарын бигэргэтэн көрөөччүлэр ытыстарын тыаһа доргуйан турбута.

Үһүс түһүмэххэ кыттааччыларбыт өркөн өйдөрүн, киэҥ толкуйдарын тургутан көрдүбүт. Кыргыттар сөптөөх толору эппиэт биэрэннэр барыбытын астыннардылар, саха кыыһа эргиччи толкуйдааҕын көрдөрдүлэр.

Төрдүс түһүмэххэ күрэстэһэр куоларбыт бары бииргэ тахсан фитнес-аэробика үҥкүүлээтилэр. Чөл эт-сиин, чэбдик өй-санаа хас тэтимнээх хамсаныы ахсын өрөгөйдөөтө. Биир тэҥник биир киһи курдук степ тэрили туһанан сүрдээх үчүгэйдик үҥкүүлээтилэр.

Бэһис түһүмэххэ дьүүллүүр сүбэ, көрөөччүлэр кэрэ куоларбыт кыталык курдук кынтайан, куба курдук устан хаамалларын, талан, бэлэмнэнэн кэлбит уобарастарын сэргии, астына көрдүлэр. Ол курдук, сыанаҕа Хаарчаана, Кыталык Кыыс, Иэйии, Сардаана сибэкки, Кыыс оҕо аанньала, ________ киирэн таҕыстылар. Куоларбыт олус бэлэмнэммиттэрэ, уобарастарын толору арыйбыта тута көстөр.

Күрэхпитин Саха Сирин импровизатор хомусчута Айсен Дьоллоохоп, ылбаҕай ырыалаах Александр Карманов, Муус-Устар ыччат бэстибээлин “СулуСТАР” ырыа күрэҕин муҥутуур кыайыылааҕа Аман Винокуров, Юрий Барабанский, “Кыталык” ансаамбыл доҕотторо Прокопий Федоров, Николай Васильев-Айтамыл, Алена Ефимова, Улмас Федоров, “Күндэли” ансаамбыл (сал. Линда Захарова — Сергучева), “Кыталык” киин балетнай студиятын иитиллээччилэрэ, сүрүн састаап оҕолоро, “Maya Dance” бөлөх киэргэттилэр.

Быйылгы үбүлүөйдээх сылга анаммыт “Кыталык Куо” күрэхпит кыттыылаахтарыгар бириис туруоран өйөбүл буолбут спонсордарбытынан буоллулар: Аверс маҕаьыын, урбаанньыт Гермогенова Розалия Васильевна; «Пластмастер» хааччахтаммыт эппиэтинэстээх уопсустуба, генеральный директор  Холмогоров Сергей Михайлович; «Люки» хааччахтаммыт эппиэтинэстээх уопсустуба, «Gdent» стоматологическай клиника; Di&An Сибэкки уонна кэрэ бэлэх маҕаһыына; SOULAB аныгы сахалыы киэргэллэр брендэтэ; “Кыталык Куо” ааты ылбыт кыайыылаах кыыска сүрүн бирииһи – “Кыталык” үҥкүү народнай ансаамбыла 45 сылынан – 45 тыыһынча сууммалаах сертификаты бириис туруорда Мэҥэ-Хаҥалас улууһун култуураҕа уонна духуобунай сайдыыга салалтата.

Дьүүллүүр сүбэ быһаарытынан маннык түмүк таҕыста:

“ДАЙААНА КУО” анал ааты уонна SOULAB аныгы сахалыы киэргэллэр брендэттэн 5 тыыһынча суммалаах сертификаты Айталыына Попова ылла.

“НАРЫЙААНА КУО” анал ааты уонна “Кыталык” оҕо-ыччат эстетическэй киин коллективыттан 5 тыыһынча сууммалаах DNS маҕаһыынтан сертификаты Диана Петрова ылла.

“ЧЭМЭЛИИНЭ КУО” анал ааты уонна “Кыталык” оҕо-ыччат эстетическэй киин коллективыттан 10 тыыһынча сууммалаах DNS маҕаһыынтан сертификаты Евгения Александрова ылла.

“АЙЫЛЛААНА КУО” анал ааты уонна Аверс маҕаһыынтан, урбаанньыт Гермогенова Розалия Васильевна, сыаналаах бирииһи Айыына Попова ылла.

“КҮН КУО” анал ааты уонна «Люки» хааччахтаммыт эппиэтинэстээх уопсустуба, «Gdent» стоматологическай клиникаттан 10 тыыһынчалаах сертификаты Алина Федорова ылла.

“ТУЙААРЫМА КУО” анал ааты уонна «Пластмастер» хааччахтаммыт эппиэтинэстээх уопсустубаттан, генеральный директор  Холмогоров Сергей Михайлович, көмүс маҕаһыыныгар 10 тыыһынчалаах сертификаты ылла Алия Дмитриева.

Куо анал ааттары ылбыт кыргыттарбытыттан муҥутуур кыайыылаах — “КЫТАЛЫК КУО” —  уонна “Кыталык” ансаамбыл 45 сыллаах үбүлүөйүнэн 45 тыыһынча сууммалаах сертификаты Айталыына Попова ылла.

Үөрүү-көтүү үктэллээх кэрэ киэһэбит сүрүн туруорааччы режиссердарынан Д.Ф. Ходулов аат. норуот айымньытын дьиэтин исписэлиистэрэ Линда Захарова уонна Мария Иванова үлэлээтилэр, уотунан-күөһүнэн, экранынан, ырыанан доҕуһуоллаан күрэхпитин киэргэтэн үлэ үөһүгэр олордулар Илья Бурнашев, Дмитрий Эверстов, Кирилл Васильев, Алексей Афанасьев. Күрэхпит үрдүк таһымнаахтык ааһарыгар күүс-көмө буолбут дьоммутугар истиҥ махталбытын тиэрдэбит.