Ахсынньы 7 күнүгэр Дьокуускайга «Сэргэлээх уоттара» култуура киинигэр Мэҥэ Хаҥалас улууһа уонна өрөспүүбүлүкэ киэн туттар наруотунай ансаамбыла, Арассыыйа үтүөлээх коллектива «Кыталык» 45 сыллаах үбүлүөйүн бэлиэтиир үҥкүү дьоро түһүлгэтэ ааста.
Биллиилээх кэлэктииби Сергей Афанасьевич Зверев — Кыыл Уолун аатынан СӨ национальнай үҥкүү тыйаатырын үҥкүүһүттэрэ аркыастыр доҕуһуолунан саха саарына Кыыл Уола туруорбут «Оһуор үҥкүүтүнэн» эҕэрдэлээтилэр.
Сахабыт сирин элбэхтэ араас таһымнаах тэрээһиннэргэ ааттаппыт, «Оһуор үҥкүүтэ», «Буойуҥҥа уһуйуу», «Уһуктуу» курдук үҥкүүлэринэн киэҥ эйгэҕэ биллэр, үгүс дьон биһирэбилин ылыан ылбыт, Василий Павлович Винокуров салайааччылаах, «Кыталык» үҥкүү народнай ансаамбылын 45 сыллаах үбүлүөйүгэр, төрөөбүт күнүгэр, көрөөччүлэригэр истиҥ дьоро киэһэни бэлэхтээтэ.
Үөрүүлээх быһыыга-майгыга, ансамбль Дьокуускайдааҕы филиалын салайааччытыгар, Алена Геннадьевна Давыдоваҕа Саха өрөспүүбүлүкэтин култууратын үтүөлээх үлэһитэ үрдүк ааты туттардым. Алена Геннадьевнаҕа баҕарабын күн сиригэр баар бары үтүөнү, олоххор үгүс үөрүүнү, дьолу-соргуну, айымньылаах үлэҕэр өссө үрдүк ситиһиилэри!
ТАПТАЛЛААХ КЫТАЛЫКПЫТ, ҮРДҮК МЭҤЭ ХАЛЛААҤҤА КӨҤҮЛЛҮК КЫЫРАЙА КӨТӨН, БУ КУРДУК БАР ДЬОҤҤУН СЫРДЫККА,КЭРЭҔЭ,ҮЙЭЛЭЭХХЭ УГУТТУУ, ЫҤЫРА , УГУЙА ТУР!
Кэнсиэргэ билиҥҥи «Кыталыктар», ансаамбылтан куорсун анньыммыт хореографтар салайар «Сандаар», «Айтыын», «Дэгэй» уо.д.а. коллективтар, өрөспүүбүлүкэтээҕи «Сарыал», «Дружба», «Кэнчээри», «Эрэл» ансаамбыл араас кэминээҕи выпускниктара кытыннылар. Маны тэҥэ ансаамбылы Сергей Зверев — Кыыл Уолун аатынан СӨ национальнай үҥкүү театрын үҥкүүһүттэрэ уонна оркестра эҕэрдэлээтилэр.
Улус.Медиа устар бөлөҕө араас көлүөнэ кыталыктары, ансаамбыл төрүттээччитэ, өр сылларга уус-уран салайааччынан үлэлээбит Василий Винокуровы кытта көрүстэ, историяны аҕынна. Сиһилии – видеоҕа.
